打印

為紀念曾經遇上

為紀念曾經遇上

梅艷芳逝世10周年專輯:為紀念曾經遇上
http://hk.apple.nextmedia.com/en ... t/20131230/18571268

十年過去,浩瀚煙波裏,群星懷念梅艷芳的情懷未變。阿梅出名重情義,背後的男人至今對她並未忘懷,摯友劉培基難忘阿梅在深切治療部留醫時,眼裏依依不捨的目光;舊愛林國斌曾跟阿梅亡命天涯,可惜兩人性格火星撞地球,有緣無份;近藤真彥是阿梅的一生最愛,阿梅甚至堅持見近藤一面才肯入院做手術。曾跟梅艷芳合作經典電影《胭脂扣》的導演關錦鵬,娓娓道來兩人合作的緣份。與阿梅有淵源的八九學運領袖王丹以及才子陶傑也撰文悼念這一代歌后。


不經不覺,一代歌后梅艷芳已離開大家10年,歲月雖留不住,可是她的風采和歌聲永遠銘記在人們腦海裏。

劉培基:陪度最後日子

著名時裝設計師劉培基,一手創立百變梅艷芳形象,他陪阿梅走過21年甜酸苦辣,陪病床上的她度過最後日子,有情有義的阿梅臨終前立下遺囑,將跑馬地毓秀大廈及倫敦物業送給劉培基。

十年前03年12月30日凌晨2點35分,呢個時間一生忘記唔到,雖然法醫官宣佈係2點50分,但其實梅艷芳離開我哋係2點35分,因為通知法醫官上嚟檢查,所以遲咗15分鐘;十年一眨眼就過,好多人同我講,唔好諗咁多嘢,但我陪佢經歷咗一生,點可以話放低,對我嚟講呢十年係遺憾!

好記得當日我喺廣州,做完羅文尾七返家,夜晚兩點幾收到梅艷芳電話,佢話體檢報告出咗,醫生話病情相當嚴重,我叫佢唔好講,怕自己唔喺佢身邊,佢諗得太多,第二日我即刻由廣州返港去佢屋企,佢坐喺床尾梳化,我乜都冇講攬住佢,佢伏喺我度喊,當然係非常難過,佢話因為婦女病,醫生話機率得3、4成,要佢盡快做治療,佢見家姐又係呢個病,唔想經歷嗰種痛苦,但唔睇醫生唔得,所以由睇中醫開始,我陪佢去上海、蘇州睇病。

難忘不捨眼神

後期梅艷芳唔睇西醫唔得,因為腫瘤影響佢去洗手間,佢會辛苦,睇西醫做電療,腫瘤消失咗,佢仲好開心打電話畀我:「冇咗囉!」成個人精神晒,佢覺得自己又得啦。佢真係好勇敢、堅強女仔,對生命意志力非常犀利,明知自己嘅病去到咁危險,仲可以做咁多工作,後期佢唔戒口,我唔能夠阻止佢做乜食乜,呢啲係佢心願,惟有支持同陪伴佢,佢話:「做化療好辛苦,如果面前有杯毒藥,相信你做我,你都會飲咗去。」

睇住佢生命一點一點流走,只能夠無奈,佢完成最後一個演唱會,之後去京都拍廣告,佢身體真係接受唔到,更加怕凍,返港即入院,其實最初入院兩三星期,佢狀態係OK,仲可以成日發訊息,約朋友嚟探佢,其後病情好反覆,要入深切治療部,醫院唔畀陪過夜,我走嘅時候,佢眼神好唔捨得,我呢世都忘記唔到。

12月24日下晝4點幾,我去到醫院,見到梅艷芳契媽、助手表情怪怪哋,我覺得唔尋常,之後醫生同我講:「劉先生,今日可能要同梅小姐插喉,咁可以幫助佢冇咁辛苦。」當時我唔太理解插喉係乜嘢事,見佢插喉後好似更加唔舒服,我打電話畀契爺醫生,佢話插喉應該仲有一個禮拜,我呆咗,嗰晚冇法瞓覺,第二朝7點返養和,見到佢好攰,望吓我就瞌埋眼,由嗰日開始,佢生命一步一步……無可奈何!

直至29日下晝,醫生話:「你哋多啲陪梅小姐,佢應該係呢幾個鐘頭嘅事。」我無言以對,由嗰時開始,唔知邊個打電話畀梅艷芳朋友嚟探佢,佢係鍾意熱鬧嘅人,有緣就嚟探佢啦。當時傳媒朋友都收到消息,嗰7、8個小時,整個香港好似震撼咗,大家只能夠陪佢,佢眼珠一直睩睩睩,我問醫生點解?醫生話係神經線正常反應,佢唔係因為見到人,直至凌晨2點幾,突然見佢助手Donny衝出病房搵醫生,我睇到機器一條線,我知時間到咗,衝埋去佢耳仔講:「唔好再擔心,我哋有緣一定再見,你照顧好自己。」

遺囑另有意義
嗰時已經好多喇嘛為佢誦經,喇嘛話要為佢誦8小時經,唔能夠郁動佢,姑娘就幫佢拆喉,我落去親口同傳媒宣佈:「梅艷芳已經走咗!」凌晨4點幾返到佢屋企,動物真係有靈性,佢嗰兩隻肥貓,由我入門、沖涼到喺梳化椅瞓覺,兩隻肥貓冇離開我一步,第二朝7點我返醫院,11點幾誦完經,我陪佢去香港大酒店,成個人麻木咗,完全唔想有感覺!

佢走咗之後……其實唔應該講,但畢竟係事實,我諗唔到佢立份咁遺囑,我唔係贏咗事業上嘅百變梅艷芳,而係一份遺囑裏面,估唔到自己多咗一個小妹妹,自己由細一個人長大,從來冇家庭,估唔到遺囑得到一份關愛,啲人講戲子無義,梅艷芳將呢句說話推翻。

梅艷芳係屬於香港,能歌善舞,能夠壓場,舞台女王非佢莫屬,百年才出佢一個巨星,我陪咗佢21年,由佢19歲出道到40歲離開,由佢第一件參加東京音樂節服裝,到最後一件入棺服裝,都係我一手做,當年華星搵我幫手做梅艷芳,我知道佢4、5歲出嚟唱歌,佢嘅經歷我似曾相識,因為我8歲開始獨立生活,我哋為咗生活幾乎冇咗童年,所以我係用心造佢。


劉培基和梅艷芳情如兄妹,共嘗人生甜酸苦辣。

「永遠係小妹妹」
人同人之間相處真誠好重要,雖然佢有時令我好激氣,佢係極為反叛嘅人,佢喺我面前唯一一次反叛,就係佢食煙仔,因為佢唔知道我反應會點,嗰次有公事上佢屋企傾,佢話心情唔係太好,工作壓力大,感情唔係咁順利,之後佢點煙食,我唔係唔鍾意人食煙,但當時好多謠傳佢吸毒紋身,佢係極度聰明女仔,部署咁多嘢喺我面前食煙,我只能夠當睇唔到。

佢喺人哋面前係大家姐,但喺我面前係唔可能嘅事,佢一出道已經知我係有脾氣嘅人,我永遠唔賣帳,佢對我嚟講永遠都係小妹妹,佢所有開心唔開心,我都陪佢經歷,92退休至02年,佢唔係咁開心,冇咗之前開心會飲酒唱K,佢冇晒興趣,因為佢成熟咗,諗嘢多咗,快樂少咗。佢走後所有風風雨雨,我都一力承擔,好多謝生命曾遇到咁出色嘅梅艷芳!

口述:劉培基
筆錄:余燕儀

[ 本帖最後由 nobody 於 2013-12-30 08:31 編輯 ]

TOP

林國斌:阿梅私下好溫柔

http://hk.apple.nextmedia.com/entertainment/art/20131230/18571270

86年林國斌認識梅艷芳,90年相戀,卡拉OK事件後他陪阿梅亡命天涯,那半年兩人緊密相依,曾想過返港後結婚,怎知卻是分手收場!阿梅走後,林國斌經常都往省善真堂拜祭,為舊愛念經。

我做龍虎武師時識阿梅,當時對佢一啲感覺都冇,幾年後我家姐過身,當時明星足球隊叫我出埠,我心情唔好唔想去,佢哋捉我去,阿梅見我悶悶不樂,佢知道後安慰我,傾咗幾粒鐘,我先知佢私下好溫柔,大家交換電話,好自然開始。

我哋一齊有好多深刻日子,第一次約會去BBQ,大家都唔識起爐,搞到倒瀉籮蟹;有晚我揸車同人嘈交,呢個女人真係義氣仔女,佢驚我唔夠人打,衝落嚟攞支棍畀我;我同佢一齊之後,搬去佢屋企住,我有次話想食羊扒,嗰晚佢唔得閒,第二日我要開工,佢問我幾點返?返到屋企見到佢點咗好多蠟燭,好浪漫,佢仲着咗晚裝,我問搞乜?拍戲咩?阿梅詐型話:「搞錯,人哋咁有心機!」我嗰時細個唔識欣賞,而家諗番好sweet。

結伴亡命天涯
佢鍾意浪漫,但我好似冇送過花畀佢,記得有次情人節仲俾佢鬧,因為佢瞓張床褥好軟,佢成日話瞓到腰骨痛,我用萬幾蚊買磁力床褥送畀佢,點知俾畀佢鬧餐懵:「邊有人送床褥,梗係送花嘛,卡都冇張。」我哋拍拖3年,但冇同佢求過婚,只係曾經有共識,當時因為卡拉OK事件,我陪佢離開香港半年,呢段日子好刻骨銘心,雖然唔關佢事,但搞到咁大鑊,佢有好多顧慮,擔心牽連到家人同我,佢唔係驚,亦唔怕死,佢話:「如果我死咗,可以幫到人,我唔怕!」我都叫勇猛,但佢某程度唔怕死過我,當時我提出陪佢離開香港,初初佢話唔使,怕牽連到我,但我覺得一個女人浪迹天涯好慘,一定要有最相信嘅人喺身邊。

當時我哋相依為命,去過塞班島、泰國、馬來西亞、新加坡,後期住喺新加坡朋友屋企,我哋唔識煮飯,多數食飯盒,最多係煮公仔麵煎蛋,嗰段時間盡量少出街,非常之悶,唯一娛樂行海濱公園。

因為朝夕相對,我哋了解非常深,大家都係臭脾氣,分手原因都係嘈交,嗰半年我哋好掛住香港家人朋友,大家都有思鄉病,不下一次提過返香港不如結婚,返香港後大家好珍惜大家,但佢太緊張我,變咗好多嗌交,兩日一大嗌三日一小嗌。最大問題係佢太鍾意照顧人,所有我起居飲食都照顧晒,唔知係咪大女人,逆佢意唔鍾意,但我大男人,唔鍾意俾人支配安排,初初嘈交我就揸車出去,返自己屋企唔理佢,佢諗咗一招唔食嘢,最耐試過兩日兩夜,我即刻投降道歉,佢眼濕濕攬住我,之後我就唔敢再走咗去。

家諗番都可惜,嗰時一齊亡命天涯,點解返港唔夠一年就分開!分開後,初段時間受情緒影響有啲唔開心,時間耐咗可以做番好朋友,加上佢家姐走咗,佢好唔開心,冇男友喺身邊,心靈上想人安慰,唔知係咪呢個原因佢諗起我,大家聯繫緊密番,一星期通一兩次電話講近況,但只係朋友間關心。

口述:林國斌
筆錄:余燕儀

[ 本帖最後由 nobody 於 2013-12-30 08:38 編輯 ]

TOP

連炎輝:手術前見近藤

http://hk.apple.nextmedia.com/entertainment/art/20131230/18571272

從事保險業的連炎輝,當年經羅君左(斌仔)介紹跟阿梅傾保險,自此兩人成為無所不談的好友,他暱稱阿梅做「女士」,還介紹阿梅的一生最愛──近藤真彥給她認識。

當年係斌仔介紹佢同我傾保險,識咗後成班一齊玩,佢好鍾意半夜打電話畀我傾偈,係我介紹佢識近藤真彥,當時華星安排近藤嚟香港做騷,因為演出要買保險,所以我識咗近藤。嗰次我叫女士同哥哥(張國榮)陪我去慶功宴捧場,女士話:「咦!細路仔(近藤),唔去。」結果兩個都有陪我去,之後介紹佢哋識,開始交換電話,嗰晚佢哋有少少觸電,之後佢覺得近藤唔係細路仔,都幾大男人又有風度,有時過日本探佢,有次近藤又嚟香港,大家約去disco飲嘢,佢哋就開始拍拖。

隱瞞病情
女士日文同英文都係有限公司,但佢哋電話可以講四個鐘,之後我哋又聽佢講番四個鐘,嗰段日子佢真係好開心,佢仲喺日本買埋樓,有次近藤喺日本做巡迴,我同女士秘密去日本,近藤安排我哋跟住佢巡迴,女士就會將身份降到好低,變普通平民混入工作人員。

之後可能佢哋兩地相隔,各有各忙,時間耐咗感情淡咗,但分手唔關中森明菜事,分手後女士都傷心,但佢明白呢段感情唔會開花結果,後來知近藤結婚,有送花祝賀恭喜佢。女士同近藤感情好特別,佢臨做手術前,都專登飛去日本見近藤,之前佢一直唔肯做手術,大家佢做手術,佢話:「除非你安排我見近藤一次。」7月我陪佢去日本見近藤,咁啱係近藤生日,大家約飲茶食飯,佢見到近藤都好開心,但女士冇同近藤講自己有事,唔想覺得係病人要特別呵護。直至佢走(死)咗,近藤先知道佢有事,晴天霹靂嚇到佢死,問點解當時咁病重都唔講畀佢知?

口述:連炎輝
筆錄:余燕儀

[ 本帖最後由 nobody 於 2013-12-30 08:42 編輯 ]

TOP

陶傑:不朽的夕陽之歌

http://hk.apple.nextmedia.com/entertainment/art/20131230/18571275

梅艷芳離世十年,令香港人驚覺一個音樂時代終結了,不可能再複製回來。

梅艷芳的歌藝不止有風格,而且有性格,還有香港六十年代滄桑的人格。梅艷芳的音線銘烙了荔園的燈光、舊樓的簷影、陋巷的幽深,香港的一個貧窮時世,在梅艷芳的歌聲裏濃鬱成一線令人難忘的孤絕。

梅艷芳的歌是不止用耳朵聽的,還用一顆心細細地觀賞。她的聲音泣血,如怨如訴,將身世沖成一杯紅酒,令香港人在酒精裏,如醉如痴,也閱讀着自己的故事。

梅艷芳歌曲的感人之處,是這一份獨特的共鳴。正如唐滌生的歌詞隱隱幻影着唐宋,當唐滌生逝世,也帶走了一台餘韻,梅艷芳之死,也令一個賣藝的江湖香港熄滅了遍地的燈光。

梅艷芳在現實生活裏有江湖女子的情義和善良。一九八九年的酷夏,在跑馬地,她與公義站在一起,從此雖形勢轉換,梅艷芳堅持自己,沒有為所謂「內地巿場」而折腰妥協。

因此,梅艷芳在歌藝之外,她的音樂從此閃爍着風骨。她的舞台在香港,而且是一九八九年那片人海激情的草地,而不是一年一度的「春晚」。她的真,她的底線,她的深情,香港百年,僅此一家。壞女孩梅小姐,你不枉你激盪歌迴的一生,你的心債已償,流年似水,你將生命活成一譜傳奇,今日,在毒霧籠罩難見天日的海港,你是我們香港不朽的夕陽之歌。

撰文:陶傑

TOP

關錦鵬:阿梅因民運拒返內地

http://hk.apple.nextmedia.com/entertainment/art/20131230/18571188
香港金像導演關錦鵬87年執導電影《胭脂扣》,助梅艷芳首度登上影后寶座,她憑該片先後奪金馬、香港電影金像獎和亞太影展最佳女主角。


我同梅艷芳淵源係合作《胭脂扣》開始,最初部戲唔係我做導演,係唐基明,後來佢拍唔到,我公司搵咗我拍,同阿梅緣份就係咁嚟。阿梅拍完《胭脂扣》後,冇辦法抽離角色,我作為導演幫助佢、勸佢、開解佢,令我哋關係比拍戲時變得更親密。

推掉《阮玲玉》
今年金馬50,我應大會要求寫咗兩封信畀阿梅,第一封想講畀阿梅聽,仲有好多人記得你、唔捨得你;第二封,係講我同阿梅之間嘅事。我生日係10月9日,阿梅係10月10日,每年我都有join阿梅生日party。02年我去阿梅生日party,佢飲到high high哋,同我講好遺憾推咗我執導嘅《阮玲玉》,後來張曼玉做咗呢個角色。89年天安門民運之後引起香港人一啲情緒,阿梅話唔再踏足大陸,但《阮玲玉》要以上海做背景,上海取景,冇辦法,所以阿梅要退出,我亦尊重佢決定,當時就好似一對男女朋友要分手咁。

張曼玉憑《阮玲玉》先後攞咗12個獎,當日(指02年)阿梅同我講,佢唔係唔開心,係真係覺得遺憾,佢話希望之後可以合作,可惜o依家已經冇呢個機會。聽晚(今晚)我會出席阿梅紀念演唱會,過往幾年大家似乎淡忘咗阿梅,今年多番好多佢身影,大家仍然好掛住佢,同以往一樣。聽晚我會同張曼玉一齊上台,講一段說話懷念梅艷芳,同埋會讀番我寫畀阿梅封信內容。


睇個唱淚難禁
阿梅係香港女兒,香港聲音,同香港60年代開始一齊挨窮搏命,一齊成長。大家見到嘅梅艷芳係個好鍾意熱鬧嘅人,但熱鬧中我見到佢其實好寂寞,用幾個字形容,佢係「熱鬧中嘅寂寞」,心事重重,壓力好大,周不時一大班人圍住佢,其實佢好寂寞好孤獨。原因除咗冇伴侶外,佢家庭亦唔係一個避風塘,佢每年幫媽媽搞壽宴,呢啲係表面上嘅嘢,佢經濟上各方面承受好大壓力。阿梅走咗之後頭幾年,我去卡拉OK都唔可以唱同聽阿梅嘅歌,怕自己受唔到,係呢兩年好啲,可以聽吓。

到今日,我仍然好掛住阿梅,仍然記得阿梅最後一次演唱會,佢做8場,我睇咗3場,因為唔忍心再睇落去,我睇3場喊足3場,差啲連後台都唔敢去,只係去過一次,我唔忍心睇。當時佢病重,劉培基都有提過阿梅用好多部暖風機吹住,但手仍然好冰冷,頭髮又甩,作為朋友睇到好心痛好難受,所以每一場我都忍唔住不停喊,嗰個場景令我最懷念梅艷芳。

口述:關錦鵬
筆錄:楊潔雯

TOP

倫永亮:精神可嘉

http://hk.apple.nextmedia.com/entertainment/art/20131230/18571190
「最記得喺錄音室見過佢喊,因為屋企人複雜問題,影響到佢情緒,佢話好擔心媽咪健康,又擔心媽咪啲錢唔知去咗邊,我勸佢唔使擔心,最緊要你繼續工作。有次佢喺紅館做騷,排練時唔順利,機關鬆脫跌落台底,好在冇受傷,嗰晚順利做完騷,佢落台時望住我,見到佢有一滴眼淚,盡在不言中。入院初期佢都幾精神,但睇住佢健康退化,當時醫院好多人陪佢,我覺得自己幫唔到手,我鼓勵佢唔好放棄,佢話:『我知,我打唔死。』佢走嗰晚,劉培基帶我入去同佢say goodbye,好慶幸好多高僧同佢誦經,好唔捨得佢!」

TOP

譚詠麟:眾人兄弟

http://hk.apple.nextmedia.com/entertainment/art/20131230/18571192

「最記得阿梅就梗係佢係唯一一個可以自由出入我哋明星足球隊嘅男更衣室啦!因為都冇人當佢係女人,個個都當佢係兄弟。最初我哋唔識㗎,有次聽講佢心情唔好,我哋有個共同朋友,我就叫朋友約佢出嚟認識吓,等我開解吓佢,嗰日我去阿梅屋企,佢一開門就同我講:『我住緊間屋唔乾淨,搞到我瞓唔到。』之後佢仲帶我出露台,話啲花盆試過四圍飛,但啲花盆個個鬼死咁大,我心諗點飛得起,嗰時咪即刻笑住話:『係呀係呀!』之後再同佢傾偈,慢慢就熟絡咗。」

TOP

黎小田:憤對是非

http://hk.apple.nextmedia.com/entertainment/art/20131230/18571194

「阿梅喺華星頭十年,全部碟都係我監製,佢第一隻碟同小虎隊合作,我搵楊凡影相,銷量幾好,第二隻就個人碟《赤的疑惑》,紅到不得了,雖然佢得19歲,但個樣好滄桑,當時啲人話佢有紋身吸毒,我叫佢唔使理,佢性格倔強梗唔開心;最記得佢因為細個營養唔好,啲牙好灰色,我叫佢換過晒啲牙,佢為咗靚差唔多換晒成棚牙。佢錄音時,我見過好多男友嚟等佢,好似Brian(周立璟)、劉坤銘、鄒世龍,我叫阿梅搵個唔係呢行,呢行啲人唔係咁穩陣,但佢鍾意靚仔,我話靚仔冇本心,跟住有眼睇,好多男友都因為佢名氣。」

TOP

陳少琪:歌寄情懷

http://hk.apple.nextmedia.com/entertainment/art/20131230/18571198
「最難忘我寫《夕陽之歌》,原本寫咗第一版歌詞,當時阿梅拍緊《英雄本色》第三集,佢好想將首歌擺喺電影用,叫我改歌詞啱江湖大姐角色,嗰時我得22歲,對我嚟講心態有壓力,結果歌詞出嚟好滄桑,好似為阿梅度身訂做。以前我幫佢寫好多歌,有時傾歌詞佢會講自己心態,記得有年佢同Brian(周立璟)拍拖,我寫咗《夏日戀人》,佢好鍾意呢首歌。阿梅為人好仗義大情大性,工作好投入,有時通宵拍完戲,第二日要上內地做騷,喺台下攰到殘殘哋,但一上台能量就嚟,

TOP

歌后十件事

歌后十件事
http://hk.apple.nextmedia.com/entertainment/art/20131230/18571202


賣唱
童年家貧,與姐姐跟隨梅媽創辦的「錦霞歌舞團」登台。長大後,阿梅與姐姐分別以「依依」和「依娜」跑江湖,在荔園、啟德遊樂場、酒廊等獻唱。

姊妹
與家姐梅愛芳年齡相差四年,姊妹情深。但阿梅自爆14歲時曾呷家姐醋,因家姐已有追求者,便偷她的靚衫及化妝品,氣得家姐紮紮跳。


初戀
「Woo...Oh...My Summer Lover,擁有這季節不要別去吧」初戀情人是圈外人,阿梅17歲時,主動追求任職警界的男子,全因與姐姐打賭一百元要相約對方。兩人拍拖兩年後分手。

IQ博士
這首家喻戶曉的卡通主題曲,原本由梅愛芳主唱,後來改由阿梅唱出。但當時阿梅曾表示歌曲感覺很怪,後經黎小田說服才促成這首經典兒歌。

壞女孩
「Why why tell me why,沒有辦法做乖乖」藝人顧及形象,阿梅偏偏反傳統、玩顛覆。當年劉培基為她設計「型而不壞」的壞女孩形象,掀起一股跟風熱潮,少女均以她的髮型為時尚指標。

不美
「在台上我覓理想,係要找到理想一於要站在台上」自覺擁有不美麗臉孔,才放膽在身上放些不美麗東西,促成其百變形象。87年舉行的「百變梅艷芳再展光華演唱會」,她以二十多個造型出場,蔚為佳話。

遺憾
阿梅臨終前接演張藝謀的《十面埋伏》,惜因狀況太差而未能完成。張導指江湖大姐角色永遠留給阿梅,因其角色無人能取代。

玫瑰
阿梅在劉德華面前,總含羞答答,一副小鳥依人模樣。阿梅當年獲港台頒金針獎,華仔送上千支玫瑰祝賀,逗得阿梅笑逐顏開。

碧咸
阿梅是英國萬人迷碧咸的超級粉絲,對偶像一舉一動都極為關注。她收藏了一個偶像親筆簽名送給她的足球,早前拍賣以9萬元成交。

六四
八九六四爆發後,阿梅積極參與「黃雀行動」,亦無懼秋後算賬,應民主派邀請,到美加義演為海外民運團體籌款。直至死前一刻,阿梅仍堅守信念,無悔當初。

TOP

Fans灣仔悼偶像

http://hk.apple.nextmedia.com/entertainment/art/20131230/18571204

由梅艷芳國際歌迷會主辦的《今夜只因您》紀念晚會,昨晚在灣仔萬麗海景酒店舉行,近百梅迷到場。據稱是梅姐第一批影圈朋友的洪羅拔在台前發言,他讚梅姐夠義氣又豪氣,並爆料說:「其實梅姐從來唔fitting,所有衫都係杜貞貞幫佢試,包括鑽石bra,杜貞貞話阿梅細過我,我緊佢就啱。」眾人亮起紫色電子蠟燭默哀一分鐘,之後播放梅姐生前點滴,包括開記者會透露患癌和演唱會等片段,台下不少歌迷拭淚。歌迷會會長蘇小姐說:「十年後仲有咁多歌迷掛念梅姐,大家好錫佢。」剛與家人去日本旅行的曾志偉,昨午在機場時說:「趕住返嚟去梅姐度呀。」蘇小姐透露志偉傍晚在會展綵排演唱會。

此外,譚詠麟昨表示因工作未能出席紀念晚會,提到何超儀捐錢為梅姐在尖沙嘴星光大道內豎立銅像,他說:「係好事,但要覺得值得先去做,唔係捐錢嘅問題,係覺得值得而唔係用錢去做。」

TOP

王丹:藝術的花朵應當開放在社會的土地上

http://hk.apple.nextmedia.com/entertainment/art/20131230/18571206

經常從媒體上看到有這樣的藝術家,當他們的作品被外界進行一些帶有政治性質的討論的時候,他們會憤憤不平地說「藝術是藝術,政治是政治,請不要讓藝術承擔政治的責任」等等。我想,如果梅艷芳在世的話,她的內心深處,不會認同這樣的說法,因為,她本人的社會關懷,在紀念「六四」的問題上,就曾經把藝術和政治,美好地結合在一起過。即使在「六四」已經過去多年的時候,她仍然堅持說不會放棄當年的支持。雖然我沒有見過她本人,但是因為這一點,一直令我對梅姑有特殊的崇敬。她的那首《親密愛人》就是我到卡拉OK的時候最愛唱的歌曲之一。

對於那些認為藝術應當與政治分開的藝術家,我可以充份理解他們心情:政治問題本身就是麻煩,而當自己的作品遇到麻煩的時候,心裏的不爽可想而知。原則上我也認為「藝術是藝術,政治是政治」這樣的論述是正確的。我更強烈反對任何政治干預藝術的企圖。我的問題是:藝術和政治真的能完全分開嗎?

首先,有一些藝術作品本身就是有政治性的動機才創作出來的,例如《國際歌》或者馬雅科夫斯基的詩歌。你可以不喜歡這樣的政治性藝術作品,但是不能因為它們有政治性就否認它們的藝術性。這樣的例子裏,藝術與政治就是結合在一起的。

其次,我們都反對政治干涉到藝術,但是其實很少見到有人──包括前面提到的藝術家──反對政治幫助藝術,或者贊助藝術的。典型的例子就是國家對本土藝術的政策扶持。法國對於美國電影的進口有政策限制,為的就是保護本土電影能夠維持一定的生存空間,這難道不是政治對藝術的幫助嗎?台灣從政府的角度,由新聞局出面,每年對國片的拍攝都有一定的金錢補助,國家的政策難道不是政治性的行為嗎?不爽自己被要求有政治關懷的藝術家,似乎也並不反對國家補助藝術。

流露對生活熱愛
這就有點奇怪了,難道對自己有好處的時候,就不在乎政治與藝術的關係了;而當自己已經羽毛豐滿,試圖擴大市場的時候,遇到一定會發生的麻煩的時候,就開始強調不要扯到政治嗎?如果真的那麼討厭政治牽涉到藝術中來的話,應當拒絕任何來自國家和政治機構對於自己的作品的補助,因為這些補助,從比例到數額,從發放對象到所支持的藝術種類,其實都無法完全避免政治考量。

第三,我們反對政治干預社會,並不是因為政治本身的邪惡,而是「干預」這種行為的邪惡。政治干預藝術,在共產國家裏面表現最為充份;但是在民主國家裏就很少聽到。換言之,政治也有好壞的相對之分,我們是否有必要一概而論呢?

政治對於藝術的干涉固然是一種極端,但是完全拒絕政治,把兩者徹底撇清,我認為也是另一種極端。有必要為了反對一種極端而跳到另一個極端嗎?政治是眾人之事,藝術家本身就是眾人之一,政治難道不應當也是藝術家應當關心的事嗎?因為是藝術家,就可以有特權放棄一個公民應盡的政治義務嗎?

民主政治的核心就是公民的參與。如果公民放棄參與,陷入政治冷漠,壞政治的因素就會趁虛而入,人民的放棄就會導致政治的惡質化。因此,藝術家也應當如同所有公民一樣,對自己所在的社會和國家有政治上的參與義務。梅艷芳為我們這個世界留下的,就不僅僅是她的歌聲和藝術成就,也有她對自己生活的土地的熱愛,以及這份熱愛帶給很多人的感動。

我希望有更多的藝術家,能夠像梅艷芳一樣,把藝術的花朵開放在社會的土地上。

撰文:王丹

TOP

TOP