打印

am730

am730

12月19日am730

Anita梅艷芳A-Z
Anita Mui 梅艷芳
香港樂壇嘅傳奇女皇

有「樂壇大姐大」同「百變天后」之稱,喺2003年12月30日因子宮頸癌離世,終年40歲。但過去呢10年,梅姐喺大家心目中就好似冇離開過咁。佢嘅作品、佢嘅聲音、佢嘅事跡,永遠令人值得回味。佢熱情好客嘅性格,令佢喺圈中有好多真心嘅好朋友。好似早前佢嘅遺物被拍賣,一眾圈中好友同歌迷就夾錢競投具紀念價值嘅遺物,特別係喺樂壇同電影成就上嘅獎座,就見證咗佢二十幾年嚟喺演藝生涯上嘅努力同成績。數數手指,佢先後都推出咗三十幾張唱片,全球銷量過千萬張;拍過四十幾部電影;開過二百多場演唱會。
梅艷芳,絕對係香港人心目中嘅「傳奇」!
Bad Girl 壞女孩
呢首歌,曾經因為歌詞太敏感,被認為太「挑逗」而被列為禁歌。「Why why tell me why,夜會令禁忌分解,引致淑女暗裏也想變壞」。當年喺廣州嘅演唱會,呢首「禁歌」因為歌迷嘅熱情,令監場嘅負責人不得不點頭「解禁」,就係咁,佢喺當年廣東省省長面前唱咗首《壞女孩》。不過亦係因為喺演唱會唱咗呢首禁歌,令佢被大陸封殺咗足足七年半,直到2002年先獲解封,喺上海開咗人生中最後一次嘅內地演唱會。
Benjamin Lam 林國斌
梅姐同林國斌喺1985至1986年間認識,1990年同居,1993年分手。兩個人同床共枕3年,林國斌陪佢經歷過卡拉OK掌摑事件,喺呢段互相扶持、最甜蜜嘅日子,梅姐曾經一度考慮離開舞台,同佢結婚,可惜佢哋最終因性格不合而分手。林國斌曾經喺訪問入面講過,話2000年梅姐家姐過身,梅姐有諗過同佢復合,可惜當時佢已經有女朋友。對於未能陪梅姐走過人生最後一段路,林坦言覺得內疚。
Cervical Cancer 子宮頸癌
呢個病,帶走咗梅姐。2003年9月5日,喺一眾圈中好友,包括成龍、劉德華及楊紫瓊等陪同下出席記者會,勇敢地公開證實患上子宮頸癌。喺接受化療期間,仍然繼續演藝工作。照舊拍廣告、籌備演唱會、錄影電視節目等等。可惜身體愈嚟愈弱,喺同年12月30日,因子宮頸癌引發肺衰竭,喺養和醫院病逝。
David Beckham 碧咸
梅姐作為大家嘅偶像,佢自己,當然都有崇拜嘅偶像──碧咸。2003年8月,碧咸以皇家馬德里隊員身份來港踢友誼賽,梅姐一班朋友特登買定靚位,俾佢近距離見見偶像。另外,梅姐嘅歌迷仲搵咗個英國朋友喺球場外等足一個月,搵碧咸喺個足球上面簽咗個名,仲寫咗句「Special to my dear Mui」,送俾梅姐做禮物。佢收到之後笑逐顏開,當正寶咁珍藏!
Eddie Lau 劉培基
香港著名設計師,曾經幫過好多歌手設計演唱會舞台服飾,佢針線下嘅華衣,粒粒都係巨星:白雪仙、羅文、汪明荃,以及合作無間嘅梅姐。梅姐嘅百變形象,大部分都係來自Eddie嘅設計,《似水流年》、《壞女孩》、《烈燄紅唇》、《妖女》、《淑女》等等,每個既鮮明又經典嘅形象,都由佢一手創造,帶起梅姐演藝事業嘅高潮。梅姐人生最後一個演唱會,身為老友嘅Eddie深知佢嘅願望,特意設計咗紅金色西式裙褂同簡單而隆重嘅純白婚紗,等她完成最後心願,嫁俾舞台。
Family 家庭
梅姐爸爸早逝,梅媽以一人之力湊大4個小朋友,所以梅姐自小同家姐梅愛芳就跟梅媽登台表演。梅媽當年喺旺角開咗間錦霞歌劇院,可惜一場大火,將劇院一切燒毀,梅媽亦因為咁負債纍纍。自此之後,梅姐就更加努力,出更多騷搵錢,仲試過一日走足7場。除咗同一血脈嘅一家五口,梅姐喺圈內都有一個好大嘅家庭,有契妹羅美薇、契爺何冠昌、公開叫一家人嘅張國榮、謝霆鋒等等。
Grasshopper 草蜢
草蜢喺《1985年新秀歌唱比賽》中落敗,但得到梅姐賞識,簽咗梅姐做經理人,跟佢四周圍登台表演。梅姐仲教佢哋台風、唱歌、跳舞,俾好多唔同嘅演出機會佢哋,所以佢哋成日都話「沒有梅艷芳,就沒有我們,這是不爭的事實」。草蜢每一次演出,梅姐都盡量到場支持;每一次梅姐生日會,草蜢都一定到場。草蜢同梅姐,又豈止師徒關係。
Hong Kong Coliseum 香港體育館
出道以嚟,梅姐喺紅館一共開咗近150場演唱會。即使2003年,佢嘅身體情況幾乎支撐唔到演出,但仍然堅持要舉行佢人生最後一次嘅紅館演唱會!連有「紅館之父」之稱嘅張耀榮都話,幫過咁多粒星開騷,最難忘,係將一生嫁俾舞台嘅梅姐,喺2003年《梅艷芳經典金曲演唱會》著婚紗嘅一幕!
IFPI 國際唱片業協會
(06年之前)攞到IFPI白金唱片或金唱片係好霸氣嘅事,要賣5萬隻碟先叫白金唱片,金唱片就要賣3萬隻。當年梅姐嘅唱片《壞女孩》創咗兩個紀錄,一項係即時變強國禁歌,第二項就係賣咗40萬隻近8白金唱片嘅成績。不過,因為非法下載呢個史上最強嘅人類發明,除咗玩殘歌手及唱片公司之外,連hmv都傳要摺埋。為免歌手們難堪,依家賣1.5萬隻就攞到金唱片,3萬隻就白金㗎啦。
Jade 翡翠台
咪睇無綫家陣搶人哋個名、又玩封殺就當佢冇料到,梅姐嘅巨星之路,其實同(以前嘅)TVB大有關連。「吹啊吹……讓這風吹」各位冇理由未聽過,翻唱徐小鳳名曲《風的季節》,令當年只得18歲嘅梅姐,喺1982年第一屆《新秀歌唱大賽》入面攞到冠軍,成功升呢做歌星。當年因為梅姐把聲夠沉厚,似足原唱小鳳姐,仲俾人起咗個朵叫「小徐小鳳」。1985年至1989年,梅姐仲喺無綫搞嘅《十大勁歌金曲頒獎典禮》入面攞足5屆「最受歡迎女歌星」。
Karen Ho 何加男
梅迷對何加男呢個名一啲都唔陌生,「嘉禾集團」前副主席何冠昌係梅姐契爺,呢個名就係契爺賜俾阿梅嘅名。當年梅姐接咗嘉禾嘅戲,最大收穫唔係片酬,係識咗何冠昌。話說當年梅姐喺父親節寄咗張卡俾佢,話想做佢契女咁話(講完)。但係呢個名後來搞到梅媽好火滾,皆因梅姐骨灰罌用咗呢個名,最後梅媽經過一番苦戰(又搶罌又喊)先用番原名。何冠昌其實同好多星都好熟,除咗同李小龍係friend底,連對語言藝術冇乜研究嘅成龍都係佢契仔嚟。
Leslie 張國榮
《胭脂扣》嘅如花同十二少、《金枝玉葉Ⅱ》嘅方艷梅同顧家明,梅姐同哥哥唔單止係兩兄妹(義嗰隻),仲傳過n年緋聞。佢哋曾經同公司,係同年代巨星,亦係同一年離世。2003年,睇怕除咗沙士之外,最令你阿媽喺廚房煮緊飯都大叫嘅消息,就係哥哥同梅姐嘅死訊。張國榮呢世人最後一次演出都係獻俾梅姐02年嘅演唱會,跳晒辣舞唱《芳華絕代》,摸胸貼鼻下下到晒位,都幾冇得頂㗎!
Michael 劉米高/苗僑偉
Masahiko Kondo 近藤真彥

絕對有理由相信,梅姐除咗鍾意唱歌,最愛嘅就係靚仔。之不過,佢嘅情花就開得唔係幾燦爛啦!當年同苗僑偉拍拍吓《香江花月夜》變咗拍真的戀愛了(係話佢哋撻著咗),最後分手;之後又傳佢戀上八十年代迷死少女嘅近藤真彥,最後梗係又冇下文啦,不過!所謂有圖有真相,梅姐秘密見近藤嘅相就做晒當年雜誌封面。而因為拍廣告拍到拍埋拖嘅劉米高,亦都係handsome boy一名。
Nursery rhyme 兒歌
要數梅姐首本名曲,你可能會話係《壞女孩》又或者《烈燄紅唇》。但唔講你唔知,實際上佢早期仲有一首唱到街知巷聞嘅名曲「靈感IQ稱得上十分之高超……」
冇錯!就係兒歌《IQ博士》。梅姐唱過唔少兒歌,例如有《千年女王》主題曲《傳說》、《電子神童》插曲《一股歪風》,當時TVB仲集合咗n個華星歌手唱嘅兒歌嚟出專輯添。
October 10th October,1963
人哋話天秤座女仔貪靚兼怕寂寞,但係1963年10月10號出世嘅梅姐根本唔使愁,除咗因為佢開親飯都高朋滿座之外,生日會就更加係人強馬壯。每年梅姐過生日嗰個禮拜都好忙,由星期一慶祝到星期七,除咗歌迷會,仲同一班死黨秘密開P。而梅姐40歲生日就同咗好多朋友慶祝,亦係佢最後一次生日。
Paul
阿Paul係邊位?佢就係向梅姐求過婚嘅圈外男友(其中一個)。呢個組合有齊悲慘愛情故事特徵,阿Paul係喺英國讀書嘅大學生,又遠距離戀愛又身份懸殊,之後梅姐一句唔啱timing就KO咗呢段情。
Proud 驕傲
梅姐係義氣仔女就係人都知,齋講佢宣布自己患癌嘅記者會,撐場嘅巨星肯定多過CCTVB台慶。無綫甘草羅君左講過好感激梅姐,有人話喺佢窮到燶之時,多得梅姐接濟,之後佢仲出書紀念呢名俠女。02年劉嘉玲嘅裸照做咗《東周刊》封面,當時嘅演藝人協會會長梅姐確實做到嘢,call咗五百幾個明星齊齊鬧爆《東周刊》,梅姐嘅俠義行為,令佢身邊嘅人都為佢感到驕傲!
Queen 女王
Anita出道以嚟,唔同階段均有唔同嘅稱謂,例如「東方麥當娜」、「百變天后」、「樂壇女王」等等,由於佢重情重義,亦被稱為「樂壇大姐大」,加上佢為香港貢獻甚大,所以亦有「香港女兒」之稱,無論佢身份係咩,喺一眾樂迷及影迷心中,佢亦如「女王」一樣受萬人景仰。
Quit 退出
1990年,梅姐舉辦30場演唱會後,宣布唔再攞任何音樂方面嘅獎,一年後宣布退出娛樂圈,並舉行《梅艷芳告別舞台華演唱會》,令傳媒及樂迷譁然。直至1994年,曾經笑哥哥「姣婆守唔到寡」嘅佢亦都「守唔住寡」復出,令久候多年嘅樂迷及影迷,能夠再次睇到佢嘅風姿。
Rouge 《胭脂扣》
1988年,由關錦鵬執導,改編自李碧華同名小說嘅電影,梅姐憑藉飾演香港上世紀三十年代石塘咀名妓如花,勇奪第24屆「金馬獎最佳女主角」及第8屆「香港電影金像獎最佳女主角」成為雙料影后,同時榮獲第1屆「金龍獎最佳女主角」及「亞太影展最佳女主角」。
其實梅姐早喺1984年經已憑電影《緣份》榮獲第4屆「香港電影金像獎最佳女配角」,及後《半生緣》及遺作《男人四十》亦獲得電影獎項,提名更加多不勝數,係九十年代票房保證。佢嘅影藝事業,絕不比歌藝事業遜色。
SARS 嚴重急性呼吸道症候群
2003年,當時梅姐原定離港就醫,但為發起《1:99音樂會》為沙士受害者籌款,擔心出埠後回港,可能會被隔離而影響音樂會,最終選擇留港,及後以「茁壯行動」成立基金會,協助受害家庭孤雛。同年7月,香港電台特別聯同《明報》合辦「抗SARS傑出獎」選舉,向抗沙士英雄致敬,梅姐高票獲獎。
Stephen Chau 鄒世龍
本身係富家子弟,亦係梅姐踏入娛樂圈後,首個公開嘅男朋友,佢哋同樣愛玩愛蒲因而結識,但Stephen同時跟當年紅星翁美玲傳出緋聞,遂淡然分手。6年後,有傳佢哋愛火重燃,仲去到談婚論嫁階段,可惜只維持咗兩個月。梅姐曾經憶述呢段感情:「大家年紀輕,脾氣都硬!」
Tattoo 紋身
梅姐初出道時,由於經常穿著長袖衫或外套,搞到有傳聞話佢手臂有紋身,當年紋身係黑社會人士嘅象徵。直至1987年《烈焰紅唇》推出,唱片封套上梅姐露出一雙玉臂,謠言終被打破。邊個會諗到今日,紋身,已經變成一種潮流。
Unforgettable 忘不了
2013年12月30日,轉眼間,梅姐逝世十周年,藝人張學友及曾志偉將為佢舉行一場慈善音樂會,主題為《梅艷芳.10.思念.音樂.會》。至今,梅姐仍令人難以忘懷。
Villain 反派
喺梅姐嘅演藝生命絕無僅有,搜索枯腸,只有兩套。
《川島芳子》,梅姐飾演歷史中有滿州國妖豔之稱嘅川島芳子,當年梅姐拍呢套戲,跟飾演婉容皇后嘅陳玉蓮有一幕親密鏡頭,佢話:「好尷尬,好幾次忍唔住笑咗出嚟。」及後憑呢套戲入圍「亞太影展最佳女主角」。
《半生緣》,導演許鞍華曾經講過:「女主角姐姐嘅角色實在好難搵到適合人選,如果梅艷芳唔拍,呢部電影就唔會開拍。」梅姐成功演繹張愛玲筆下被黑暗吞噬嘅人物——顧曼璐,為佢帶嚟第17屆「香港電影金像獎」及第3屆「金紫荊獎」兩項最佳女配角殊榮。
Welcome 歡迎
梅姐一生以誠待人,出名圈內、圈外好友甚多,一向來者不拒。
九龍女。八十年代,梅姐同8位對演藝界躊躇滿志嘅女藝人,包括藍潔瑛、張曼玉、吳君如、曾華倩、羅美薇、劉嘉玲、邱淑貞及上山詩納因經常合作而成為好友,當時,才子黃霑幫佢哋改咗個好響嘅朵,就係「九龍女」。
劉德華。梅姐同劉德華相識於1984年《新秀歌唱比賽》,雖然二人感情一直撲朔迷離,但肯定嘅係,喺梅姐人生最後階段,劉德華身體力行,給予最大嘅支持及鼓勵。
張學友伉儷。八十年代,梅姐與羅美薇(May May)因上契何冠昌夫婦而成為金蘭,及後May May下嫁張學友,學友亦成為契妹夫,三人感情深厚。梅姐出殯當日,張學友伉儷位列家屬席上。
好友點止呢幾個,2002年,喺梅姐入行二十周年紀念專輯《With》入面,邀得譚詠麟、張國榮、張學友、劉德華、王菲、鄭秀文、陳慧琳、林憶蓮、黃耀明、許志安、蘇永康,11位著名歌手合唱,佢人緣有幾好?唔使講都知道。
X 禁忌
至今仍被內地政府視為禁忌嘅六四事件,梅姐卻一直突破「禁忌」。當年梅姐為海外民運團體籌款,已故民主派元老司徒華形容佢「有情有義」、「深明大義」。當年民運被鎮壓,梅姐拒絕到內地拍攝並辭演《阮玲玉》,佢更有份參與當年營救民運領袖「黃雀行動」。
1999年,唔少藝人開始淡忘六四事件,梅姐仍支持平反,佢話:「如果我支持六四方面半途而廢,就會好浪費以前所做嘅一切,如果我依家放棄,就連一線生機都冇。」
2004年1月喺梅姐嘅葬禮上,六四民運領袖之一吾爾開希,罕有地獲得香港政府批准入境,出席喪禮向佢致敬。
Youngster 小孩,少年
梅姐 4歲時已經同胞姊梅愛芳踏足舞台,喺梅媽創辦嘅「錦霞歌舞團」,邊唱歌邊讀書,幫補家計,最初喺荔園、啓德遊樂場賣唱,直至中一輟學。佢曾經喺電台訪問中講過:「以前唱歌嘅人唔受尊重,被稱呼為『歌女』,家人都阻止同學同我來往,睇住同學玩,我永遠孤單一人。」雖然係咁,亦為佢日後嘅演藝生涯,累積咗豐富嘅經驗。
Zhao Wenzhuo 趙文卓
1995年,梅姐透過張國榮認識趙文卓,遂成為情侶。可惜呢段相差9年嘅姊弟戀不被睇好,加上二人演藝地位非常懸殊,輿論最終導致兩人分手。
梅姐曾經話:「如果時光可以倒流,我一定會解釋清楚導致分手的嗰場誤會,如果當年咁,依家我已經係趙太太喇。」
至於「嗰場誤會」,趙文卓喺去年一個節目中回應:「這份戀情我非常的珍重,我會永遠把它埋在心底的最深處,我既然愛這個女人,我就會對她,對我們之間所有的秘密及一切負責。」
梅姐喪禮上,趙文卓用「此生至愛 一路好走」8個字嚟表達對佢嘅緬懷。
後記:最鬼憎梅艷芳
呢個梅艷芳,缺點多多,掗搾、扮阿姐、冇義氣,樣樣都關佢事,樣樣都要理,仲要包拗頸。明明阿爺唔俾佢喺內地唱《壞女孩》,佢寧願被封殺都偏要唱。藝人唔應該掂政治,佢又偏偏唔理,走去支持89民運,仲為「黃雀行動」出力。點解唔學下人,時時擦阿爺鞋,起碼有得搵、有得食,呃番一官半職,指點江山吖!你話幾爽!仲話佢係「香港女兒」,發揮香港精神,你話佢邊度配吖!
(鑑於近年部分傳媒愛指鹿為馬,顛倒是非,亂嗡廿四當大道理,於是本報嘗試以同一手法寫呢篇後記,發覺寫寫下,差啲陷入精神分裂狀態,自我感覺非常之唔良好……如欲想了解本報對梅姐嘅真正睇法,勞煩將整篇文章嘅意思倒轉。唔該!)

[ 本帖最後由 angel 於 2013-12-20 10:58 編輯 ]

TOP